اللہ تعالٰی نے انسان کو اپنی عبادت کے لیے پیدا فرمایا اور دنیا کو دارالاسباب بنا کر انسانی حوائج و ضروریات کو بھی اس کے ساتھ لگا دیا ، پھر اپنی عبادت کرنے کے طور طریقے سکھائے اور احکامِ خداوندی کی روشنی میں ضروریات کا بندوبست کرنے اور مسائل کا حل تلاشنے کا پابند فرمایا بس یہی ایک مسلمان کا کل دین اور دنیا ہے کہ اس کی عبادات بھی شریعت کے تابع ہوں اور معاشرت ،معاملات و نظریات بھی دین میں ڈھلے ہوں اور خواہشات بھی دین میں رنگی ہوں ،تجارت بھی شرعی اصولوں کے تحت ہو اور زراعت و کاشتکاری بھی، صنعت و حرفت بھی اللہ تعالٰی کی مرضی کے مطابق ہو اور سیاست و سیادت بھی ۔اللہ تعالٰی نے امت مسلمہ کو جو دین عطا فرمایا وہ روئے زمین کا سب سے بہترین جامع اور رب تعالٰی کا پسندیدہ دین ہے۔

اِنَّ الدِّیْنَ عِنْدَ اللّٰهِ الْاِسْلَامُ یہ دین دین اسلام ہے، اس دین میں نہ رہبانیت ہے اور نہ تعطل ، اس میں نہ افراط ہے اور نہ تفریط۔ اس دین میں دنیا کی نہ کل نفی کی گئی اور نہ دنیا کو سر پر بٹھایا گیا ہے۔ اس دین میں دنیا اور آخرت سب کچھ ہے، البتہ دین کو ہر معاملے میں فوقیت اور برتری حاصل ہے ۔ایک مسلمان دین و دنیا ہر اعتبار سے احکامِ الٰہی کا پابند ہو جائے اور مرضیات ربانی کا مطیع ہو جائے، اسی مقصد اور مشن کو لے کر دین اور دنیا کا پلیٹ فارم سرگرم عمل ہے ۔ اللہ تعالٰی اسے مفید، مؤثر اور بار آور بنائیں۔ آمین